ရခိုင် ကဗျာ အစီစိုင် - သောက်ခါမပြောကောင်း

မောင်္ဂလာပါ

MAP Radio FM 102.50 MHz ရခိုင်တိုင်းရင်းသားဘာသာ အစီးစိုင်ကို အားပီးနားထောင်နီဂေတ်တေ ရခိုင်သူ ရခိုင်သားအပေါင်းရို့ကိုအေနိမှာတော့ ရခိုင်ကဗျာ ချေတိကို ထုတ်လွှင့်လားဖို့ဖြိုက်ပါရေ.. အေနိမှာ ထုတ်လွှင့်လားဖို့ ကဗျာချေတိ သောက်ခါမပြောကောင်း ၊ရခိုင်စာ ၊ရခိုင်ပြည်က ဖုန်း နဲ့ ဖောက်ပြန်နိန်သော သတ်ပုံတခု ဆိုရေ ကဗျာချေတိပင် ဖြိုက်ဂတ်ပါရေ.. ဒေအပါတ်မှာတော့ အွန်လိုင်း Recoder ပျက်နီလို့ အသံဖိုင်ကို မတင်ဖြိုက်လိုက်ပါရာ... စာသားကိုပဲ တင်ပီးလိုက်ပါရေ..

Date . 15.2.2015

Time: 17:00:18:00

DJ . Zin Myo

သောက်ခါမပြောကောင်း -

-------------------------

အတိတ်က ရွှေထီးဆောင်း ငွေထီးဆောင်း

မင်းထီး မင်းဘာ ဝေသာလီ သျှစ်သောင်း

ပင်းဝါချီစစ်ကြောင်း ဘင်းဂါချီစစ်ကြောင်း

သောက်ခါ မပြောကောင်း

ပြောခါ မသောက်ကောင်း။

ဒေးဝန်းကြီးအကြောင်း သျှင်ဥတ္တမအကြောင်း

ဦးရွှေဇံအောင်အကြောင်း ဦးရဲကျော်သူအကြောင်း

အမျိုးဘာသာ သာသနာ မေသေမေ၀ါ

သောက်ခါ မပြောကောင်း

ပြောခါ မသောက်ကောင်း။

ငါ့လိုင်ခြောင်း မင်းလိုင်ခြောင်း

တသီဖြည့်လို့  မပြည့်ရေ လှိုဏ်ခေါင်း

စကားအကောင်းနန့်  တန်လား မတန်လားမသိ

ဝိုင်းမိဂတ်ပျယ်ဆို သာလို့ ခြီ

ချောင်းကျ မြောင်းကျပေါင်းကလေ့ မနည်းပါလီ။

သမိုင်းစာအုပ်ထဲက မင်းထီ မင်းဘာ ဒေနိန့် မှာ

ရှင်ပြီး နိုးထလာကေ

ရင်ကြီးကျိုးကျပါမေ

ငါ့ယောင်လည်းကောင်း မင်းယောင်လည်းကောင်း

ယမကာနံ့ တထောင်းထောင်း

လပျင်း ငဖျင်း ချငြင်းသန်အပေါင်းရို့ ကို

သကျွတ် ပကျွတ် ပရွက် နရွက်

ထထွက်ကြီးလားအောင်

' ထည့် ' ပလိုက်မေလား မဆိုနိုင်

' စေ့ ' ပလိုက်မေလား မဆိုနိုင်။

ယကေလေ့ တဆေ

အေကဗျာကိုတော့ ... သောက်ခါလေ့ ဖတ်ကောင်း

မသောက်ခါလေ့ ရွက်ကောင်းပါယင့်ဒေ....။။

ရိုးမရင်သွီး

(ဝတီကြေးမုံဘလော့မှ)

ရခိုင်စာ -

---------

ရခိုင်ရို့ ဘ၀

ရခိုင်ရို့ အလှ

ရခိုင်ရို့ ကိုးကွယ်ရာ ရခိုင်စာ။

ရခိုင်ရို့ ဂုဏ်သိက္ခာ

ရခိုင်ရို့ ကံကြမ္မာ

ရခိုင်ရို့ အားထားရာ ရခိုင်စာ။

ရခိုင်ရို့ တန်ဖိုး

ရခိုင်ရို့ မျိုးရိုးအမွီ

ရခိုင်ရို့ အသိပညာ ရခိုင်စာ။

ရခိုင်ရို့ ဂီတ

ရခိုင်ရို့ ရသ

ရခိုင်ရို့ ယိုင်ကျေးမှု

စီးဆင်းလားနိန်ရေနိန်ရာ ရခိုင်စာ။

ရခိုင်ရို့ အတိတ်

ရခိုင်ရို့ အရိပ်

ရခိုင်ရို့ ခြီရာ ရခိုင်စာ။

ရခိုင်ရို့ ပစ္စက္ခ

ရခိုင်ရို့ အန္တိမပန်းတိုင်

ရခိုင်ရို့ ဆုပ်ကိုင်လားရာ ရခိုင်စာ။

ရခိုင်ရို့ အနာဂတ်

ရခိုင်ရို့ စိတ်ဓါတ်

ရခိုင်ရို့ ရှင်သန်ရာ ရခိုင်စာ။

ရခိုင်ရို့ အသက်

ရခိုင်ရို့ အိမ်မက်

ရခိုင်ရို့ မျှော်လင့်ချက်တိ

ကိန်းအောင်းနိန်ရေနိန်ရာ ရခိုင်စာ။

ရခိုင်ရို့ သွီး

ရခိုင်ရို့ ခရီး

ရခိုင်ရို့ လွတ်လမ်းကို

လမ်းပြပီးစီနိုင်ရေအရာ ရခိုင်စာ…။

(မြောက်ဦးကဘီးလူ)

မှတ်ချက်။ ။ရခိုင်သားရခိုင်သမတိက ရခိုင်စာကို မြတ်နိုးပနာ တန်ဖိုးထားလို့  ရီးသားဖို့ မကြိုးစားကတ်ကေ တခြားဇာလူမျိုးကလေ့ လာပြီးကေ ထိန်းသိမ်းစောင့်ရှောက်မြှင့်တင် ရီးပီးဖို့ မဟုတ်ပါ။ ရခိုင်စာနန့် ရခိုင်ရို့ စာပီ ဖွံ့ ဖြိုးတိုးတက်ခိုင်မာလာအောင် လုပ်ရဖို့ ဆိုရေ အသိစိတ်နန့် ဝတ္တရားက ရခိုင်သားရခိုင်သမတိုင်း ယုံကြည်စွဲမှတ်ထမ်းဆောင်လားရဖို့  မွီးရာပါတာဝန် ပင်ဖြစ်တေ။

ရခိုင်ပြည်က ဖုန်း -

-----------------

ခေါ်လို့မကိုင်

ကိုင်လေ့မထူး

ရခိုင်ပြည်က ဖုန်း

ကျရောက်မိုးရာ

လီပြင်းထန်သော်

ခြတ်တက်ခြတ်တက်

အသံထပ်သော်

ဖင်ပူးပါအောင်

တဗျင်းအော်မှ

ကြားသည့်တစ်လုံး

ရခိုင်ပြည်က ဖုန်း …..။

ကြားခိုက်တစ်လုံး

အားတက်လာသော်

မိဘမောင်နှ

အလွမ်းသယ်ခိုက်

ပြန်ပြုတ်ကျသည့်

ဟခီကျထမင်းဆုံး

ရခိုင်ပြည်က ဖုန်း…………

အားပင်မနာ၊ ရှက်ပင်မရှက်

ရာစု (၂၁ ) ဒေပိုင်ခေတ်မှာ

ဘီဟာရီစုတ် ဖုန်းအစုတ်ကို

ပရစ်မျက်နှာ စကားချိုချိုနန့်

တာဝန်မယူ အသင်ထားဝံ့သည်

အသင်လူပင် ဟုတ်ယင့်လော …

(ချစ်ဖွယ်ဦးခေတ်သစ်ဖုန်းကဗျာ)

ဖောက်ပြန်နိန်သော သတ်ပုံတခု -

“ရ”ကိုမနိုင် ရခိုင်ကိုမိန်း

----------------------------

ဆိုရိုးစကား ဟိပြန်ငြားလည်း

“ရ”နန့်“ယ”ကို ခွဲခြားပိုင်ပိုင်

မပြောနိုင်ရေ ရခိုင်ပြည်သူ

လူသူတချို့ အတွေးဖောက်ပြန်

Brain မမှန်လို့ သူရို့ပြောသံ

လီသံတိက “မင်းရှိ/ရှေ့မှာ”အစား

“မင်းချိမှာ”လို့ လီသံထွက်ကေ

ရခိုင်သံနန့် အမှန်ရေးရန်

သူရို့ရှာပြန်ကေ “မင်းဟြိ”လို့ရာ

ပျင်ကတ်ပြန်ဗျာယ်။

“ရှာရေဖွီရေ” စသည်စကား

ပြောကြားဖို့က အချိန်ကျကေ

မဆီမဆိုင် သူရို့တိက

ရေးပြကတ်စွာ

“ရှာ”၏အစား “ဟြာ”လို့တခါ

ရေးပြန်လာကေ ဖောက်ပြန်သူရို့

သတ်ပုံသစ်။

..................

ဥက္ကာပျံ

အိမ်လွမ်းဌက်ချေ

အိမ်လွမ်းဌက်ချေ blogger က ကိုးကားထားပါရေ

အေနိမှာ Online Radio က အားနည်းချက် ဟိနီရေအတွက်နဲ့ အသံလွှင့်သူရဲ့ စကားပြောသံ မပါလာဖြိုက်နီပါရေ ..