အခုနောက်ပိ်ုင်း (အလှပြင်ပစ္စည်း) တိမှာ Mercury လို့ခေါ်ရေ လူ့အသားအရီမှာ ကင်ဆာဖြစ်နိုင်လောက်တေ ဓာတ်တိပါဝင်ရေ အသားဖြူလိမ်ဆီး ဆိုရေ(lotion) တိ ကကောင်းခေတ်စားလာစွာနှင့်ပတ်သက်ပြီးကေ ရင်ထဲမှာ ကျိတ် မနိုင်ခဲမရ ဖြစ်လာလို့ အေဆောင်းပါးကို မျှဝီပီးလိုက်ရခြင်းဖြစ်ပါရေ။
ရခိုင်ပြည်၊ မြန်မာပြည်နှင့် အာသျှပိုင်းဒေသနိုင်ငံတိမှာ “အသားဖြူမှ တော်ဝင်ရေ ထက်မြက်လှပရေ” ဆိုရေအယူအဆ ဇာပိုင်ပေါ်ထွန်းလာရေလဲလို့ ပြန်ကောက်ဖို့ဆိုကေ ထိုးလွန်ခရေနှစ်ပေါင်းရာကျော်က ကိုလိုနီခေတ်ကို ပြန်ပြီးကြည့်ဖို့လိုပါရေ။အနောက်နိုင်ငံသားတိ (အထူးသဖြင့် ဥရောပသားတိ) စွာ ကိုလိုနီခေတ်တလျှောက်လုံးမှာ အဖြူရောင်အသား၊ ရွှေဝါရောင်ဆံပင်၊ နှာတံချွှန်ရေ ရုပ်ရည်ပိုင်သျှင်တိမှ ထက်မြက်တေ ထူးချွှန်မြင့်မြတ်တေဆိုရေ အတွေးအခေါ်ကို အာသျှ၊ အာဖရိကနှင့် အမေရိကရို့မှာ နောင်းနောင်းရိုက်သွင်းပစ်ခပနာ လူဖြူတိ၏ profile ကိုမြှင့်တင်ရာမှာ ကကောင်းအောင်မြင်ခကတ်တေ။
သမိုင်းနှောင်းပိုင်း (၂၀) ရာစုပိုင်းမှာ ကိုလိုနီတိချန်ပစ်ခရေ လူဖြူလူမဲခွဲခြားရေး လူမျိူရေးပြဿနာတိစွာ စဉ်ဆက်မပြတ်ဖြစ်ခကတ်စွာကို တွိရပါရေ။ ဥပမာအားဖြင့် အမေရိကန်နိုင်ငံမှာ လူမဲတိစွာ “ကျွန်” အဖြစ်နှင့် ၁၉၆၀ နှောင်းပိုင်အထိ လူဖြူတိ၏ဖိနှိပ်ခြင်းကို ခံခရကတ်တေ။ အလားတူပင် တောင်အာဖရိကနိုင်ငံမှာလည်းသော့ အသားအရောင်ခွဲခြားအုပ်ချုပ်တေ စနစ်ဆိုးစွာ (၁၉၉၆) လောက်ခါမှ အရင်းပြုတ်လားခစွာပါရာ။ဖော်ပြခရေ သမိုင်းဆိုင်ရာအချက်အလက်တိနှင့် ရှိဦးဖော်ပြခရေ အသားဖြူလိမ်းဆီးတိ ဇာပိုင်ဆက်စပ်ပါရေလဲလို့ တွေးကောင်းတွေးနီကတ်ပါလိမ့်မေ။ ဒေပိုင်ပါ…
ရခိုင့်လူ့အဖွဲ့အစည်းမှာလည်းသော့ အသားအရောင်ခွဲခြားရေ လက္ခဏာတိက အမေရိကန်နိုင်ငံ၊ တောင်အာဖရိကနိုင်ငံရို့လောက်မှာပိုင် မပြင်းထန်တာလည်း ဟိနီပါရေ။ အသားအရောင်ကိုမူတည်ပြီးကေ ခွဲခြားဆက်ဆံစွာရေ ယင်းလူသား၏ ကိုယ့်ကိုယ်ကို ယုံကြည်မူကို ပျက်ပြားစီပါရေ။ ဒေအကြောင်းနှင့်ပတ်သက်လို့ အကျွန့်ကိုယ်ပိုင် အတွိအကြုံကို ဝီမျှချင်ပါရေ။အကျွန်အငယ်ခါက ကျောက်ဖြူမြို့မှာ ကြီးပြင်းခစွာပါ။ ပင်လယ်နားမှာနီရေအပြင် အမိအဖက်အမျိုးတိကလည်း အသားမဲရေအတွက် အကျွန်လည်းသော့ မဲမဲချေပါရာ။ အသားကမဲမဲ ပိန်ကပိန်ပိန် ကုလိမ္မေချေတယောက်အနီနှင့် အကျွန့်ကိုယ်အကျွန် လှပါရေလို့ ယောင်လို့တောင် မတွေးခရေအပြင် တခြားသောသူတိက ဖော်ပြခြင်းလည်း ဘဝမှာ တခါလည်း မကြားဖူးခပါ။ “အသားဖြူဖြူချေနှင့် လှလိုက်တေ” လို့ အပြောခံရရေ ကုလိမ္မေချေတိကိုရာ အားကျစိတ်နှင့် ငေးကြည့်ရုံရာ တတ်နိုင်ခပါရေ။ကိုယ့်ကိုယ်ကို မယုံကြည်မူ မကြေနပ်မူတိနှင့် အကွန့်မျက်နှာစွာ ရှုံ့သထက်ရှုံ့ပြီးကေ ရုပ်ဆိုးပြီးယင်း ဆိုးပြီးကေ ငယ်ဘဝတလျှောက် “ရုပ်ဆိုးမချေ” နာမည်ရာ တွင်ခရပါရေ။အင်္ဂလိပ်စာမှာ အမြဲတမ်းထူးချွန်ရေအကျွန်စွာ ယင်းအင်္ဂလိပ်စာကိုပင် အရင်းပြုစာသင်ယင်း ဘဝကိုရပ်တည်နိုင်ခပနာ ကံကောင်းစွာဖြင့် နိုင်ငံတကာနှင့်ရင်ဘောင်တန်းပြီး ရပ်တည်နိုင်ရေအတွိအကြုံတိရလာပြီးကေ ပညာအရည်အခြင်းတိ ပိုတိုးများလာခါ ကိုယ့်ကိုယ်ကို ယုံကြည်လာလတ်တေ။ တီထွင်ကြံဆဥာဏ်တိတိုးပွားလာခါ မျက်နှာမှာ အပြုံးပန်းဆင်ရကောင်မှန်း သိပါလတ်တေ။အခုအချိန်ခါမှာ အကျွန်အငယ်ခါက အကျွန့်အသားအရီနှင့် ရုပ်ရည်ကိုကြည့်ပနာ ခါးခါးသီးသီးဆက်ဆံခရေလူတိကို အကျွန့်ပညာနှင့် ပြုံးပြီးကေ လှပနီရေအကျွန့်မျက်နှာကို မြင်စီချင်ပါရေ။ရခိုင်သမ ညီမချေတိ၊ အသားညိုလို့ အသားမဲလို့ ကိုယ့်ကိုယ်ကို မကြေမနပ်၊ မယုံမရဲဖြစ်နီကတ်တေလား။ အကျွန် အကြံကောင်းတခုပီးပါရစီ။ နိစဉ်နိတိုင်း အိပ်ရာကနိုးတိုင်း ကိုယ့်ကိုယ်ကို မှန်မှာကြည့်၊ ပြုံးပြပြီးကေ “ငါကောင်းလှပါရေကား” လို့ စိတ်ကပြောပါ။
လူတယောက်၏အလှအပစွာ အသားအရီနှင့် ရုပ်ရည်မှာ မူတည်စွာမဟုတ်။ အရေးကြီးစွာက ဥာဏ်ပညာ၊ အတွိအကြုံနှင့် ကိုယ့်ကိုယ်ကို ယုံကြည်မူဖြစ်ပါရေ။ အသားဖြူမှ စိတ်ဖြူစွာမဟုတ်ပါ။ စိတ်ဖြူကေ အသားမဖြူတာလည်း ဖြူစင်ရေအသား အရီ ပိုင်သျှင် ဖြစ်လာဖို့စွာ ဧကန်မလွဲပါရာ။
(မမပြုံးသူ)
0 comments:
Post a Comment